Dugaaggu waa xayawaan duurjoog ah oo hilibka iyo dhiigga xoolaha ku nool, qaarkoodna dadka iyo duunyadaba cuna.
Xoola dhaqatada iyo dugaagga doonaya inuu xoolaha ka cuno dagaal joogto ah ayaa ka dhexeeya haddaan laga yureyna neef reebi maayo, xero ayaa loo oodaa habeenkii lagu xareeyo xoolaha dadbaa ilaaliya maalintii oo dhan, haddaan sidaa la yeelin caano maynu dhanneen cadna maynu cunneen.
Haddaba waxaa la dhihi karaa ganacsatadu waa dugaag caqli leh oo ka khatarsan midka duurjoogga ah ee aan caqliga laheyn, ma aha wax meel fog inaga jira oo aan ka digtoonaan karno. Guriga ayuu kula joogaa sida dugaaga duurjoogta ahi ugu noolyahay dhiigga xoolaha ayaa ganacsataduna ugu nooshahay dhiigga dadweynaha danyarta ah. Ganacsatadu sida bahalaha hal mar ma wada liqaan dadka ee way silac dhilaan. Waxay sameeyaan wax kasta si ay ganacsigooda uga helaan faa’iido aad u badan, waxay sameeyaan khiyaamooyin badan oo dhammaantood waxyeello ku ah dadka. Waana halkaas meesha ay dadka ku dilaan, waa faa’iidada xad dhaafka ah ee ay ganacsiga ka raadiyaan.